好「打耳」啊~~~八方讚緊嘅，梗係唔係同爆seed講完嘅高永文啦，而係日前扮「廢青學生妹」兼跳飛機撐辱警罪嘅正義聯盟召集人李偲嫣，事關佢嗰身打扮引起好大迴響，而佢自己對呢個look好滿意噃，成件事，仲唔夠得意？
偲嫣BB噚日喺fb留言：「九龍城的一套校服，30元在旺角購入的無鏡片膠框眼鏡，姊妹借來一用的背囊，原來可以配搭到頗理想的效果。」同時將當日相片同《IQ博士》入面嘅小雲拼埋，強調「這兩天一直收到歡喜這做型（造型）的朋友留言，看來我這個『妹豬』學生妹，可以再多點和大家見面！」有人大讚「李小姐扮的好靚哦！」；亦有人話「你HURT完我對眼未」，呢啲係咪叫做，各豬入各眼？