雖則係有個阿叔令到向來斯斯文文嘅食物及衞生局局長高永文爆seed、又雖然一位師奶就令n屆特首黑馬陳智思啞口無言，特區政府都唔使驚到唔落區啩？正當花生友質疑，某啲傳媒噚日話梁班子疑叫停落區騷，到底堅唔堅？署理特首曾俊華就出嚟闢謠，否認梁班子有此打算，強調政府會以不同方式落區爭取支持。
唔通因為特首梁振英外訪不在港，政府先唔出稿譴責相關傳媒子虛烏有？抑或政府都係視乎邊份傳媒報道，先決定係咪高調出稿澄清？姑勿論乜因素都好，花生友都向唔少政府中人八過，確實係冇叫停為政改落區宣傳嘅打算，事關政府將政改定為民意戰，唔通真係一如黎明齋坐喺度就會瘦，梁班子足不出戶就有民意咩？
向區議會進發
之不過好似早前嗰隻梁班子大規模落區宣傳騷，相信此情不再。據知梁班子稍後會向區議會、地區組織等活動進發，喺呢啲場合爭取支持。好似民政事務局局長曾德成咁，噚日就去咗灣仔區議會sell政改，有政府中人話呀，「呢啲都係叫做落區啫」。
而日前被市民鬧「呃細路」而動怒嘅高永文，噚日喺公開場合再解畫，話當日已經好小心向小朋友解釋政改嘅情況，竟然仍被市民批評誤導呃細路，因此比較「上心」，佢認為部份小朋友都好成熟，能夠分辨是非，「唔認為小朋友唔應該接受呢啲資訊」。
花生友