小米國際部副總裁「虎哥」Hugo Barra噚日訪港，正式公佈小米專門店「小米之家」好快進駐香港，雖然佢唔肯透露選址，但華華收到風，呢間俾人話勁似蘋果專門店嘅舖頭，會落戶旺角荷里活商業中心20樓，喺正對手魅族19樓嘅香港辦公室樓上，擺明挑機咁款！
Hugo就話，香港「小米之家」係中國以外首個落腳地。但話晒係首間海外店舖，小米今次選址旺角樓上舖，好似欠缺氣派喎，睇番對手蘋果Apple Store全部喺一線商場，好似中環IFC、九龍塘又一城、銅鑼灣希慎廣場，盡顯果迷標榜嘅生活態度。
除咗開專門店，Hugo今次嚟香港嘅主要任務係發佈定價1,599元嘅新手機小米4i，仲足足用咗一個鐘去介紹呢部機，非常長氣。問佢小米幾時上市，佢就忽然扮懵，話自己咩都唔知喎。