何浩文(Dominic)早前拍《鴨王》慘被定型，Dominic最近諗住食住個勢去內地登台keep人氣，點知上周三喺東莞就被人摸下體，昨日更有周刊爆疑似富婆向Dominic問價，出價一百萬蚊月包。
據知Dominic自從拍完《鴨王》後，做咗王晶旗下愛將，星運真係好過同戲女主角袁嘉敏，仲有機會去內地巡迴登台有「錢途」，難怪之前有唔少試過鏡、連演都冇演嘅奀模扮「夜蒲女」去內地夜場搵銀，就知掛個名都已經有價有市，Dominic仲係真《鴨王》點會唔受歡迎，早前趁《鴨王》未落畫，即上內地登台四月至五月已接咗50場，每場有成6萬人仔，即係兩個月接晒啲騷，300萬袋袋平安。
不過報道表示，Dominic喺溫州疑有富婆為咗與「鴨王」Dominic相聚，握手時畀個杯墊寫上「一百萬人民幣，陪我一個月」嘅字句，但Dominic覺得自己有能力搵一百萬，計落唔係好多啫，認為自己係想做戲，做鴨只會喺戲裡發生。Dominic目前兩個月隨時賺300萬，100萬被包一個月出手，又真係低咗啲嘅!