前港督彭定康落區食蛋撻食到街知巷聞，商務及經濟發展局局長蘇錦樑Greg噚日有樣學樣，去咗油塘食撻喎，但佢唔係自己為食，而係為咗配合慶祝香港工業總會55周年嘅活動而獻身。
Greg蘇噚日係拍住工總副主席鄭文聰、郭振華、理事鍾志平等去到油塘一間餅店，幫手派免費撻畀區內長者。去得當然食埋一份，Greg蘇話佢自己非常之咁鍾意食，後生嗰陣可以一口氣隊3、4件咁多，𠵱家就……總之唔想咁「巨體（諧音：具體）」。至於咁多種餅皮之中，佢最愛都係香口而傳統嘅牛油皮，八方仲以為佢鍾意「蘇（酥）皮」㖭。Greg蘇仲突然醒起落區仲有一樣可以做，就係嗌番句：「2017，一定要得。」不過佢連政改單張都冇，嗌完都冇乜嘢好做。