威靈頓街鏞記地下正在裝修，封晒圍板，若一時不察，仲以為鏞記暫時停業㖭，好彩有大字貼出：「照常營業」，食客會睇得清楚嘅。呢日行過鏞記，竟然見到鏞記熟客個個識得嘅經理威哥守在大廈電梯口，對啲熟客打躬作揖，禮貌周到之極，行埋去叫聲威哥，同佢開玩笑：「你係資深經理噃，做乜企街呀？」威哥又立即鞠躬：「過門都係客，驚啲客人唔知，企起度盡量提醒佢地搭𨋢上二三四樓呀！」威哥認真唔話得，在鏞記服務數十年，任勞任怨，對客人招呼周到，既細心，又體貼，啲老夥計就係如此忠心嘅。
沿鏞記行上擺花街，未到7-11之前，見到有一間新食肆，內裏裝修似乎刻意舊派，唔通sell懷舊？此店地方細，地下係酒吧，食飯要上二三樓，座位不多，賣的是新派粵菜，店名「大官廳」（Tycoon Tann），以畢明嘅角度觀之，就係玩「食字」，大官係舊時大戶人家，下人對大少爺之尊稱，譬如李國寶就係大官，李國章係二官，大官二官不等於Tycoon（中文譯作大亨），但大官常到嘅地方，叫做大官廳，也無不可。好奇之下，上去試吓，一味招牌菜「匈牙利攣毛豬叉燒」就真係幾好味，其餘如墨西哥黑豚叉燒包、小籠包就不外如是，普通料啫，要在威靈頓街打開名堂，還須努力。
老友記大衛M夫婦例牌一年一度自三藩市回港探親訪友，來電郵約食飯，去邊度好呢？鏞記、陸羽、上海總會、China Tang、福臨門都去過咯噃，諗咗一輪，代佢訂皇悅酒店國福樓，去到以為冇人識，向知客搵枱，點知還未開聲，已有人高聲叫「左先生，M先生已經到咗」，咁叻嘅？
一時唔認得係邊個，後來問佢攞名片，先知道係總經理陳年。陳總話：「我地成班人以前係福臨門嘅，梗係認得你同M先生啦！」餐飲呢行嘅老夥計認真記憶力驚人，大衛M移民已久，左丁山不是福記常客，陳總竟然仲記得我地曾經一起在福臨門飲茶，唔怪得有人話忠心老夥計係食店嘅資產，店有一老，如有一寶；點餸時，大衛請陳總代勞，佢叫我地食點心及涼瓜斑翅，果然樣樣冇得頂，唔怪得係米芝蓮星級餐廳，弊在好味得滯，左丁山係咁食炸田雞腿與煎腐皮卷，唔記得自己要戒吃煎炸嘢，於是第二日就中招，喉嚨乾，講說話快啲就會咳，唯有飲涼茶啦！