昨日有內地券商發報告，估阿爺可能調整股票印花稅，由現時千分之一單邊徵收，變為雙邊徵收，觸發大市急瀉。就算消息當真，以現時成交萬億（人民幣．下同）計，只不過增加每日區區10億元交易成本，點解上面會咁驚？要明白內地股民呢種獨特印花稅恐懼症，真係要回顧歷史。
1991年，內地股市面世後曾多次暴升暴跌，阿爺一直將印花稅率舞上舞落，作為最重要調控工具，覺得股市有泡沫就加稅，覺得要谷股市就下調稅率。至今已搞咗10次，最經典2007年5月，突宣佈印花稅率由千分一加到千分三，滬綜指翌日冧近7%。
財政部2008年9月下調印花稅後，至今已近7年冇動靜。如果再啟動此封塵多年的武器，不單意味中央認為現時股市有泡沫，仲行番以前調控的舊路，個市就好快玩完。
黃尹華