越睇越覺阿巴莫域治同摩連奴（圖）似兩夫妻：當年有錢佬阿巴，在「老婆」摩佬輔助下事事順利；點知竟嫌「悶蛋」、「冇激情」而拋棄「糟糠」；之後佢搵過八個老婆，最後發覺「穩定」還是比短暫的激情實際。與摩佬復合後，第二年便重奪英超冠軍。經歷過風浪的關係才會長久，我相信呢兩公婆自此會有排甜蜜，一個可比費格遜的英超王朝，已經展開。
二人復合，當然要各有改變才行。阿巴不再追求悅目足球，但最重要，是不再揮霍。他要車仔自負盈虧，每分每毫皆要用得其所；試問世上除了摩佬，誰的買人眼光可讓阿巴放心？至於摩佬亦變了， 10年前初到英超，雖已贏過歐聯，但在四大聯賽未有任何戰績，便狂妄地高呼「I am a special one」；上仗對水晶宮前，三奪英超十拿九穩之際，他卻反而異常低調。未贏，才最需要建立團隊自信；贏了，還需要甚麼心理戰？寸，從來只是摩佬戰術的一部份。
要同摩佬做到friend，要有份量又有胸襟，才不會被佢「寸親」反面，首選是費格遜；費Sir在自傳中談摩佬，竟然話：「佢其實好易相處又好人！（唔係啩？）仲可以講笑寸番自己；唔知肥賓同雲格有無咁嘅氣量？」咁又好難怪雲格嘅！人哋啲球迷寸摩佬悶，佢竟然寸人十年無冠先叫悶，好hurt人！只可惜，摩佬要喺現今英超圈子搵人做到friend，好似冇乜囉。
方栢翹
now足球評述員