邊個係英超「關鍵先生」？球迷第一個印象係幫車路士封王嘅夏薩特，或者喺曼聯成日神救嘅門將迪基亞；不過據英國《每日郵報》統計，原來英超關鍵先生係阿仙奴防中高基連，佢上陣嘅話，槍手勝率接近八成，周一佢正選作客侯城，球隊又贏3:1，領隊雲格唔知後唔後悔季初借佢去查爾頓，如果打足成季，隨時追到車路士。
助阿仙奴贏侯城3:1
高基連今年攔截總數已經超過120次，冠絕英超，周一作客侯城，雲格繼續派佢鎮守中場，高基連當然冇甩拖，全場作出六次鏟截，成功率達83.3%，亦有兩次解圍。有呢個好防中，槍手中前場攻擊好手當然放心進攻，不過頭兩個入波過程有啲運，28分鐘「山神」阿歷斯山齊士射罰球，省中對手改變方向入網，五分鐘後艾朗藍斯轉身快射，又係省中對手，收死侯城門將夏柏，不過阿仙奴入第三球就好靚，艾朗藍斯一記直線，山神冷靜單刀射入。槍手半場贏3:0，換邊後主隊就由史堤芬昆尼破蛋。今場比賽過程都有啲火藥味，下半場阿仙奴中堅哥斯尼就踢到大衛美拿塊面流晒血，踢歪少少隨時眼都盲。
鎖定歐聯雲格開水喉
阿仙奴全取三分，已經領先第五位嘅利物浦九分，得失球差亦拋離22球，除非最後四場聯賽瘋狂大敗，加上紅軍餘下三戰全勝，否則都肯定落實前四位，連續18年出戰歐聯。阿仙奴季尾越踢越勇，近10場聯賽九勝一和，同高基連在陣都有關係，《每日郵報》統計，高基連上陣19場，阿仙奴就贏足15場，勝率達78.9%（見附表），如果雲格開季已經重用高基連，英超爭霸戰隨時改寫。點都好，阿仙奴落實前四，雲格都要為下季鋪路，雖然之前有傳佢今夏唔打算買人，不過雲格就否認，仲好大口氣講一係唔買，一買就買世界級球員。
識睇，一定係睇足英台【英波Live】：
http://soccer.appledaily.com
http://bit.ly/engballlive