正所謂禍不單行，火箭後衞夏登（James Harden）失落今季常規賽MVP之後，周一季後賽次圈首戰再遇上打擊，主場出擊面對有基斯保羅（Chris Paul）缺陣嘅快艇，都以101:117輸波；客軍前鋒比歷克格芬（Blake Griffin）就威到盡，連續兩場造出大三元，係繼02年傑特（Jason Kidd）之後，再有球員連續兩場季後賽造出大三元。
格芬連創三雙媲美傑特
NBA喺周一賽前公佈常規賽MVP得主，勇士後衞史堤芬居里（Stephen Curry）以總分1,198分大熱當選，但佢話自己冇咩時間開心，因為要繼續準備季後賽喎。夏登就以936分排第二，其實論數據佢更勝居里，都叫做雖敗猶榮；不過，失落MVP之餘，夏登所屬嘅火箭仲要輸波。周一西岸季後賽首圈開戰，火箭面對有基斯保羅大腿肌肉受傷缺陣嘅快艇，理應實食冇黐牙；夏登都叫發揮正常㗎啦，貢獻20分同12助攻，但第四節尾段防守鬆散，俾快艇一輪三分雨拋離。結果快艇以16分大勝，最威就係比歷克格芬，貢獻26分13助攻14籃板，繼上場淘汰馬刺嘅首圈Game 7大戰後，再造出大三元。
至於MVP得票排第三位嘅騎士前鋒勒邦占士（LeBron James），喺東岸次圈首戰亦都吃悶棍，主場面對公牛以92:99輸波，今季季後賽不敗身被打破。
