股神畢菲特旗下的巴郡公司上周六舉行股東大會，呢個投資界一年一度的盛事，有唔少內地股民捧場，現場提問大師點睇A股，希望指點迷津。股神好識做，大讚中國經濟奇蹟，但就話A股投機主導。股神事迹內地傳媒已廣泛報道，有人就提咗條好有意思問題：點解中國冇畢菲特？
最簡單答法，中國股市歷史短，冇人可以好似畢菲特咁，可以用四五十年投資往績證明自己。不過，內地所謂股神，由早年的楊百萬，到近年基金一哥王亞偉，都係靠炒作起家，似乎冇人憑價值投資理念可以發達。
所以條問題應該係，究竟價值投資喺A股有冇用？答案似乎係負面。A股制度根本唔完善，價值投資都冇用武之地。有位內地投資人士道破天機：說到底，大家都是對整個體制沒信心，不可能搞長線投資。
黃尹華