無綫財經小花林芷彤上周喺節目《創富坊》晒口技，只用17.791秒讀出158個字嘅「免責聲明」，技驚四座。噚日大班花生友等睇林芷彤再次表現世界級摩打嘴，點知佢用番正常速度22.85秒讀完，整整慢咗5.059秒，令捧場客十分失望，唔知佢係咪受咗上頭勸喻，唔可以再晒口技呢？
MastaMic嗌失望
曾經拍片挑機嘅網上饒舌歌手MastaMic，之前用15秒就讀晒「免責聲明」完勝林芷彤，噚日MastaMic接受電話訪問，澄清冇諗過以林芷彤做目標：「當日佢出咗呢條片，朋友tag咗我，佢都讀得幾快，老實講唔係歌詞，字眼幾繞口同巉手，我先想玩，15秒係好無聊原因，因為Instagram只可以拍15秒片。」MastaMic亦冇諗過咁多反應：「我冇挑佢機或者想KO佢，其實無聊小遊戲，冇鬧人冇粗口，但網友話我懶叻，好無辜！」
對於噚日林芷彤回復正常速度，MastaMic哈哈笑話：「大家都好失望！可能個別事件啫，某程度上聲明要讀清楚啲。」
撰文：馮仁昭