平時搭開電車出入嘅朋友，呢排要好好留意有冇坐啱110號電車。
因為由噚日開始，110號電車將會由一般電車，變身為流動照片館，電車公司與世界知名藝術攝影師K-narf合作，將K-narf所拍攝逾百張以香港街頭美食同埋街市為主題嘅復古照片，喺呢架代表電車110周年嘅車廂中展出，乘客逼到好似沙甸魚時，都可以好好欣賞大師級作品。
今次展期由噚日起至下月中，電車公司話，照片係由K-narf於展出前數天走訪大街小巷親自拍攝，再以特製嘅鋁質膠帶裝置於車廂內。
香港電車董事總經理魏文話，今次活動係要凸顯香港文化，將昔日記憶同今天面貌相映對照。