意大利勁旅AC米蘭可能來港上市！如果屬實，當年經常飛去歐洲叫外國企業來港上市嘅港交所（388）前主席夏佳理就飲得杯落喇。
不過且慢，AC米蘭嘅賣盤傳聞其實已經傳咗一段時間，之前傳過娃哈哈老闆宗慶後、萬達創辦人王健林有意洽購，但隨即被當事人否認，最近泰國富商Bee Taechaubol周圍放風，話已經傾成呢單刁，將會成為AC米蘭新東家。
市場隨即有傳聞話，呢位「蜜蜂先生」買入AC米蘭之後，有計劃安排球隊嚟香港、上海或者米蘭上市，搞到成件事越煲越興奮。
之但係，AC米蘭𠵱家班主意大利前總理貝盧斯科尼又話，佢打算保留AC米蘭嘅控制權，預算只係將小部份股權賣畀一班投資者。所以話呢，AC米蘭嘅股權都未知賣成點，蜜蜂先生嘅如意算盤係咪打得響都係未知數。