理工大學喺第43屆瑞士日內瓦國際發明展橫掃15個獎項，其中應用生物及化學科技學系憑「綠色生物柴油催化劑」攞到特別大獎同金獎。
學系助理教授容家富話，團隊花咗2年時間，研究廿幾種物質，發現一種由金屬氧化物製成嘅催化劑，可以簡化提煉生物柴油嘅程序，令成本比𠵱家平一半。容家富話學系𠵱家已經同催化劑生產商接洽，希望盡快推出市面。
另一個由理大工業及系統工程學系發明嘅智能停泊系統就贏得特別嘉許金獎同特優獎，學系專任導師何道森話，當停車場裝咗感應器同拍咭機，再用WiFi連接學系研發嘅中央系統，車主只要安裝咗手機應用程式就知道停車場位置分佈同空位數目，仲可以預約車位同畀錢。