昨日講起有一位72歲之「千八日」先生親筆來信，講及佢自本欄第一日開檔起，就一直睇「GiGi細語」。本欄係幾時開檔嘅呢？有不少朋友以為係自黎老闆蘋果日報創辦開始，即1995年，其實此乃誤會。蘋果日報創辦之前，冇叫過左丁山寫專欄，只叫左丁山做副總編輯，負責財經版，左丁山怕壓力大，做唔嚟，冇應承到。直至1997年回歸前，黎老闆話重組名采作者陣容，叫左丁山加入，當時為咗筆名，曾拗過一輪，點解用「左丁山」呢個筆名呢？求簡單易讀吖嘛，壹週刊創辦之時，宣傳口號係「不扮高深，只求傳真」，寫稿要追求簡單易明，唔好故意高深。肥佬黎話明要多寫中環時事、逸事、趣事，及財經時評，唔好嚴肅板起面孔說教，左丁山當然照辦。自己打銀行工之時，辦公室在聖佐治大廈，常到愛丁堡大廈、歷山大廈開會，下午就不時蛇王到「於仁行」（後稱太古行，現稱遮打道九號）嘅咖啡廳GiGi飲下午茶，同時喜、美林啲美股經紀（佢地係返工前）相遇，吹水，講八卦，故此奉肥佬黎之命寫中環輕鬆小品兼論時事咯喎，筆名就叫做左丁山，欄名就叫做「GiGi細語」，現在時移世易，GiGi早已執笠，於仁行已經拆卸重建，反而左丁山之名，中環幾乎無人不知，實乃異數。
三國演義講到天下分久必合，合久必分，眨吓眼寫咗接近18年，頃接副刊執行總編輯指示，因要重組稿費結構，在現存條件下，左丁山可以寫到六月三十日，故此今日開始，本欄進入倒數期，還有56天與讀者神交，七月一日本欄就會自動消失。左丁山以前講過，報紙專欄稿匠與報紙之關係只係「內容供應者」一名，報紙有權隨時更換供應者（content supplier），唔駛多講理由，過往有啲寫稿人被「重組」，就話事關言論自由，不民主，只係為自己面上貼金，自抬身價而已。左丁山一向以為報紙有報紙嘅考慮，供應者亦有自己嘅交換條件，大家因條件不合而分手，事屬平常，正是business is business，至於讀者反應如何，報紙負責人應該已考慮咗，諗住唔會有負面影響，先至下決定嘅啫！
左丁山用不同筆名為報紙業餘寫稿，一向係玩票性質，由1975年蒙潘粵生先生睇得起（已經唔記得點樣與佢認識），應邀在明報晚報以「明台樹」筆名寫經濟評論，之後在明報、星島、華僑、經濟及蘋果寫稿，至今滿40年，在蘋果寫到六月三十日，就滿十八年，睇吓以後仲有冇適合機會寫落去！