相隔九年，摩連奴喺周日再一次帶領車路士贏英超冠軍。摩帥回歸車仔，經過頭一季適應後，今季部署成功喺冇乜壓力下贏雙冠；話之周圍啲葡萄友炮轟車仔踢法沉悶，有冠軍就係贏家，難怪車路士下季衞冕英超嘅賠率已經熱到得兩倍多啲。
車路士喺周日英超靠夏薩特射失12碼後補中，以1:0小勝水晶宮啱啱好夠封王。呢場波正正係摩帥奪標方程式嘅寫照，唔怕你話悶，總知最緊要守得穩保到勝局，亦係今季聯賽第11次小勝對手一球。
老竇入院難開懷
車仔贏冠軍，唔少對手都好「葡萄」，曼城嘅比歷連奴就話佢哋踢法更漂亮入更多波，不過一向我行我素嘅摩連奴，就用佢老家葡萄牙嘅俚語回應：「話知班狗吠，旅團會繼續行程。」意思係唔使理其他人說三道四咁解。摩佬再話：「我哋做咗一切爭標需要做嘅嘢，所以咪係冠軍囉，係實至名歸。」雖然摩帥一向對捧盃都表現得好cool，不過周日佢可能真心開心唔落，因為佢爸爸日前入咗醫院接受手術，據報病因係腦出血，令到摩佬都好擔心。
下季冧莊僅2.375倍
摩連奴喺上季重返車路士四大皆空，不過一個成功嘅失敗者係識得吸取教訓，今季季前引入前鋒迪亞高哥斯達同埋中場法比加斯，兼回收返門將泰拔高圖爾斯，到今個夏天只要喺中堅位置上補充新血，同埋幫多傷病嘅哥斯達搵返嘅前鋒替補人選，下季車路士依然好強。難怪英國博彩公司𠵱家一致睇好車仔可以喺下季衞冕，Sky Bet開出2.375倍大熱，次熱曼城已經係4倍。車仔今季無驚無險封王，有人將佢哋同10年前摩帥首次領軍封王嘅車仔比較下；不過04/05球季嘅車仔至少創咗四項今時今日都仲未破到嘅英超紀錄，最高積分、最多勝仗、最少失球同最多清白之身次數，秤落似乎經典啲。
識睇，一定係睇足英台【英波Live】：
http://soccer.appledaily.com
http://bit.ly/engballlive