唔經唔覺，政府發動政改宣傳戰已經有個幾星期，剛剛過去呢一個禮拜就有唔少問責局長落區，成績係點，大家「有目共睹」。花生友聽聞，有啲建制中人事前都唔太睇好呢次民意戰。
呢位建制中人指，今次宣傳戰嘅形式同上次政改嘅「起錨」相當接近，不外乎落區派吓單張、親身接觸市民等。但佢指出有一樣同上次好大分別嘅，就係上次整個活動都係由特首辦統籌，規格同今次改由政制及內地事務局負責差好遠。
有事新聞處要孭鑊
呢個變動好唔好呢？有建制中人分析，對於政府內部、尤其係一眾新聞官就唔係好事，因為由政制局統籌，新聞處只係執行嘅話，若然去到現場有咩冬瓜豆腐，新聞處就要孭鑊。
但係從另一角度睇，建制派啲地區組織、政黨就對今次安排似乎頗為受落。因為上次「起錨」嗰陣，啲地區團體係差不多去到啲官員臨落區前幾個鐘頭，先至知道邊位官員、幾多點鐘會落區，而今次佢哋就一早知道，所以大家就見到啲區議員着晒政黨背心，大大隻字寫住自己個名喺心口嚟宣傳自己，加上年尾就區議會改選，有咁好嘅機會曝光，班地區人士點會唔受落？但同時多咗人早咗知道官員落區詳情，咁走漏風聲、遇到狙擊嘅機會自然亦更高。
雖然今次安排有人歡喜有人愁，但建制中人提醒花生友，呢次安排變化可以睇得出，現屆政府仲係唔太信公務員系統。
花生友