上個禮拜，前特首董建華先至出過嚟，叫泛民要維護全香港人嘅福祉，呼籲泛民唔好綑綁投票反政改。嗱，八方都好想知道，董生針對政改嘅「肺腑之言」，到底有幾多香港人聽得入耳呢？自由黨榮譽主席田北俊都話啦，董生在任時民望又唔係高，睇唔到佢對市民有幾大說服力，而作為前任特首卻頻頻點評政事，對香港管治唔太好。
之不過因腳痛落台、覺得留低畀離開更需要勇氣嘅董生，自然有非凡毅力，唔會理外界點睇，身為團結香港基金主席嘅佢，今日又聯同總幹事鄭李錦芬見傳媒，宣佈基金會未來嘅工作方向嘞。喺政改多事之秋，董生頻頻出動，相信隻腳已經冇咁痛。