NBA季後賽次圈周日展開，東西岸常規賽一哥命運各異。西岸一哥勇士，由史堤芬居里（Stephen Curry）貢獻22分，以101:86擊敗到訪嘅灰熊，ESPN更指居里以大熱姿態當選常規賽MVP。東岸一哥鷹隊就失威啲，主場以98:104不敵有禾爾（John Wall）同比爾（Bradley Beal）先後受傷嘅巫師。
勇士上圈面對塘鵝，防守對方內線大將安東尼戴維斯（Anthony Davis）甚為吃力，不過周日對住擁有內線雙塔馬克加素（Marc Gasol）同蘭度夫（Zach Randolph）嘅灰熊，反而仲輕鬆；當然「浪花兄弟」繼續發揮外線威力，令對手難以招架，居里全場貢獻22分同七助攻，三分波仲八射四中㖭。
贏波嘅勇士好消息一個接一個。據ESPN報道，居里成為今季常規賽MVP，係勇士繼1960年嘅張伯倫後，再誕生MVP；周二主場對灰熊嘅game 2，「咖哩仔」將會拎個獎座同球迷分享喜悅。
巫師傷主將照贏鷹隊
至於東岸一哥鷹隊就慘嘞，周日主場對巫師就食悶棍，以六分之差輸波，今季季後賽不敗身被破。咁其實巫師又係抵贏嘅，禾爾整傷手腕同比爾整傷足踝，兩個都負傷繼續打，其中比爾獨取28分，係客軍贏波最大功臣。
