人妻黃婉曼Icy跳番入電視台做記者？係咪報道天氣先？咦，個咪牌係E~~ATV？原來係新一輯《監警有道》單元劇啲劇照啫。Icy做嗰集係第3集，成集講警方處理公眾遊行示威時一啲唔同類型嘅投訴警察個案，同埋監警會點樣研究投訴課交嚟嘅報告。
Icy嗰part嘅藍本，係退休警務處處長曾偉雄著名嘅「黑影論」，劇情話戴住黑手套嘅港男警察高鈞賢一手捉住Icy……個man爆攝影師張雷嗰部攝影機，即係前一哥所講嘅「黑影」，Icy好英咁講：「知唔知道你𠵱家係嚴重侵犯新聞自由！」
劇透慎入！呢part嘅藍本個案涉及6項指控，包括兩項濫用職權、兩項疏忽職守，其餘兩項為無禮及行為不當，全部證明屬實；劇集會如實反映，喺劇照都睇到高警員隻手㩒住個鏡頭，唔係當日曾偉雄話嘅「卡喺攝錄機度」。
方凝「轉行」做Madam
呢輯《監警有道》一共8集，今晚起逢周二7點喺無綫及港台電視31播出。港台搵到好多美女型男幫手拍攝，除咗Icy，仲有近期好紅嘅方凝BB周家怡，不過佢今次唔做記者，走去做Madam，但慘慘豬俾人投訴。仲有喺神劇《大時代》一人分飾三角嘅游飈做投訴警察抄牌唔公道嘅司機。
今晚播出嘅第一集講兩個「老婆」爭個死鬼老公間公屋嘅「中港矛盾」個案，個男人嘅香港前妻同大陸現任爭屋，要趕個大陸現任走，警察到場調停，最後決定鎖咗間屋，點知轉頭個警察又俾人投訴。八方只想講，個靚靚Madam（由𡃁模Jennifer飾演，仲唔係警花？）俾人投訴、喺投訴課落口供時個樣真係……都係你哋自己睇啦。
李八方
mailto:[email protected]