各地聯賽荼靡，幸歐聯到戲肉，德西甲Ｂ字頭領頭羊明晚守尾門對決，準決賽當決賽睇；巴塞隆拿（Barcelona）擁三條煙嘅火力，招呼傷兵唔少嘅拜仁（Bayern Munich），應該唔會再悶親球迷。
還記得車仔喺歐聯唔識攻，主場俾巴黎聖日耳門加時踢出局？好嘞，歐聯四強今晚開打，淘汰賽兩回合，危急關頭一定要識強攻破敵。四隊中除咗奪標最冷嘅祖記喺水準唔高嘅意甲，以擂台躉身份都只係平均每場入1.88球失0.56球外，其餘三隊歐聯爭標常客，喺國內大超班。講精采，必選明晚巴塞隆拿喺魯營迎拜仁，值得捱夜。兩軍防守硬淨，巴塞聯賽平均只失0.54球，而拜仁更低至0.48球，但嚟到歐聯，兩軍今季戰績顯示肆攻如猛獸嗜血；拜仁單係分組賽作客三戰入咗10球，上輪鬥波圖，首回合出巴西中堅丹迪甩晒轆輸1:3，但返到主場變陣大炒6:1。巴塞更勁，今季歐聯客戰五勝其四，唯一敗仗係分組賽敗走巴黎聖日耳門；但八強兩勝法兵，同樣復仇成功，強隊本色，犯錯即能快速修正。
莊家今場開出巴塞要讓傷兵唔少嘅拜仁半/一，除咗唔多重視後者對上三屆有兩屆入決賽嘅輝煌戰績，亦唔多理兩季前準決賽，呢支德國班霸兩回合計瘋狂七蛋贈巴塞。不過由於拜仁聯賽提早封王，當時在陣、並兩回合俱有士哥嘅湯馬士梅拿（圖），連同上周六聯賽鬥利華古遜、獲免戰嘅中場重將沙比阿朗素，今場大戰勢復任正選。
至於另一中場負責掃蕩嘅拿姆及會代替「計時炸彈」丹迪任中堅嘅查維馬天尼斯，上仗亦只係踢咗60多分鐘，收寓賽於操之效；雖然拜仁仍然冇咗箭頭羅拔利雲度夫斯基同洛賓，但只要後防不再犯作客波圖時嘅錯誤，用穩守突擊，加上煞食死球攻勢，要取作客入球不難，下盤值博。巴塞近兩戰大炒科爾多瓦及基達菲共入14球，「三條煙」美斯、蘇亞雷斯同尼馬佔11球，氣勢澎湃，但來到歐聯對手大幅提升幾倍，作戰心理截然不同，用近況去押注上盤，小心中伏，寧加注入球「大」。
波神
電郵：mailto:[email protected]