「我要呃細路！講完！」切切實實，無花無假，高局長反常激動，更突出政府的真心話！
呃細路，博大霧。高官大人問心呀，會呃唔出口？袋住先，袋一世，袋埋下一世，輪迴N次，都是一個相同的袋。千秋萬袋，袋袋相傳，呃你個細路，呃你細路個細路，呃慣了，個個局長一個樣，講完。
呃得就呃，雞鴨鵝唔夠秤，都一定賣得。
基本法呃過的細路，今年已經十N歲，政府還口口聲聲說，通過了這個袋，將來實有機會優化。優什麼化？個袋釘多兩條線？車多個嘜頭？拉鏈改做扣鈕？無玩啦，收……咩啦。
一定要呃，2017如果袋住先，千二人選委會，幫你揀好晒。二至三個袋，是阿爺指派漁農界投票的格仔款。你想要真正的LV模式，等優化吧，但唔保證等幾多N世。鵝頸橋個阿伯派傳單時說，千二人揀，定係五百萬合資格選民自己揀好？阿伯自己正正是千二人揀出來的摺凳特首，好極有限！有自知之明的話，早應該引咎自炒！咁啦，為表優化誠意，跳鵝頸橋謝罪先啦！