判張震遠入獄四星期（張保釋出外上訴）之裁判官姓香名淑嫻，有老友問左丁山識唔識呢位香官或知道佢嘅背景？你估左丁山係通天曉咩，唔識就唔識，而且係第一次見到香淑嫻呢個名字，但就係因為佢判張震遠入獄，當堂聲名大噪，中環有人拍掌向佢致敬，但亦有建制派法律界人士聞訊，哼咗一聲，滿面不悅之色，要打聽呢位香官究竟有何背景。
法治之區吖嘛，香港有得你叫，大梁粉被宣佈破產及入獄之後，又有一位法官摑特區政府一巴，就王維基之港視免費電視發牌一案，判港視嘅司法覆核勝訴，發還行政會議重新審議，令行政長官幾尷尬。王維基雖然話與同事飲咗三支香檳慶祝勝訴，但唔駛咁歡喜住，呢個世界有一招式，叫做拖字訣，審議一事，隨時拖得一兩年，拖到2017閒閒地，王維基要搵定銀紙同梁振英政府鬥長命，左丁山唔係幾樂觀啫。
有咁啱，得咁蹺，有一位自稱「千八日先生」嘅讀者親筆來函，由蘋果日報轉送過來。「千八日」其實就係將個香字拆開嚟寫啫，呢位香先生話今年已經72歲，「GiGi細語」第一日開檔（十八年前），佢一直睇到依家，佢問吓香姓之來源，傳說話香姓出自姓查是否可靠。
前一輪左丁山去睇馬會贊助嘅大型馬術馬戲表演Cavalia，中場休息時在酒會碰到Laura與Victor呢對查氏夫婦，Victor話佢對尋根極有興趣，翻查族譜，浙江海寧查氏來自山東，但不知係山東何處，總之山東查氏在宋末元初為避蒙古兵入侵中原，一支遷往浙江，一支隨宋帝昺、陸秀夫等人南下，宋帝昺在零仃洋跳海後，就逃入今天之東莞，再分為兩批，一批（始祖查開祥）將查字下面一劃改為上面一撇，由查變香，另外弟弟就改姓任，同樣在東莞落籍，時維1274至1289年間，故此追溯源頭，東莞香任與浙江海寧姓查，700年前原是一家。姓香嘅人好少，查百度百科之香姓，全國姓香人士不過兩萬，直情係「少數族裔」，與浙江查氏一族之歷代顯赫人物輩出，相差好遠，此則不知是否與家山風水有關了。廣西合浦亦有香姓，例如已故之公民教育委員會主席香灼璣（曾蔭權表哥）。香灼璣係知名民國將軍香翰屏之子，排行第幾，唔記得咯；香港電台以前有位香灼珊女士，係香灼璣妹妹，對左丁山講過佢在家排行第24，可見香將軍兒女之多。將軍未在香港落難之前在內地常與胡適、林語堂、郭沫若等文人來往，精於書畫，有儒將之稱。