港超聯位列尾二嘅黃大仙，噚日作客深水埗運動場以5:1大炒YFC澳滌，提前一輪護級成功，兼踢和富大埔返甲組。
黃大仙賽前以14戰8分，僅以一分領先前日逼和傑志嘅大埔，噚日只要贏波就可以護級「還神」，結果上半場就有隊長辛祖梅開二度，加上黃駿軒入波，以3:1領先有福田健二破蛋嘅澳滌。殺得勝起嘅黃大仙易邊後仲有染咗一頭藍髮嘅楊賜麟，同埋廖培楓各建一功，終以5:1殺「滌」，全取三分後，領先榜尾嘅大埔四分，提早一輪宣佈護級成功之餘，更獲高層加碼，全隊職球員獲3,000蚊贏波獎金。
黃大仙教練潘文俊話今季好似坐「過山車」一樣︰「球隊喺盃賽踢出好成績，聯賽就要鬥到最後階段先確定護級，總算鬆一口氣，真係好開心。」至於慘成「升降機」嘅大埔，秘書長陳平話，「黃大仙表現好固然值得留低，但我哋最後一場對標準流浪，球員為自己、為球會都會繼續搏命。」
