恒隆地產（101）董事總經理陳南祿認真陰功豬，噚日又輸馬，佢隻馬仔「天時地利」表現都真係幾曳，舊年初首次落場，連埋噚日跑咗5場，經常跑包尾或尾二，最叻係今年1月跑尾五，噚日喺沙田跑第4場，又係尾二。
好在陳南祿睇得好開，早排見到佢，問起佢隻馬，佢即刻自嘲，話自己𠵱家缺少運動，間唔中跑步都跑得好慢，有次跑步碰見朋友，對方笑佢跑步嘅速度同佢隻馬「天時地利」有得揮。佢拎出嚟講笑，即係都唔放喺心上面喇，EQ真係高。
佢仲怪自己，當初叫練馬師幫手揀馬時，冇講明要隻馬跑得。咁佢下次再買馬時，記得要將「跑得」同「贏得出」寫清楚啲喇。