「一周三件」本周起，改為一、三、五見報，繼續為大家推介有潛質爆升股。本周首件推介是山東墨龍（568），集團係所有深港AH股當中，第二大折讓股，H股市值又細又奀，深港通密鑼緊鼓，買定墨龍，等北水炒爆。
香江18隻有對應深圳上市嘅H股，墨龍H股現價（5.53元），比深圳上市A股（折約16.8港元）大折讓咗67%之多，係繼浙江世寶（1057，AH股折讓69%）之後，最大折讓嘅深港股。而計晒全港88隻，滬深有對應嘅H股當中，墨龍AH股折讓，亦係排第四位。單係計算AH股折讓空間，尤其對北水嚟講，墨龍吸引到爆。
深港通概念煞食
而港交所（388）主席周松崗啱啱喺上星期講，期望深港通喺上半年有開波嘅時間，在下半年直式落場。家陣得番兩個月時間，就過咗上半年，諗到嘅係，單係公佈深港通時間表呢個消息，資金肯定已經先嚟炒作，而AH股折讓，更加係鐵膽。再講，墨龍得2.56億股H股，等值14億元咁大把，深圳嘅北水一通關，墨龍係可以掃到甩轆，墨龍夠晒point。
墨龍經過2013年大出血1.75億元人仔，上年已經tunaround轉賺2,000萬元人仔，而今年半年度，集團預計會持平，到最多增長30%，主要係高附加值產品同新客戶，攞到突破。嚟緊半年度成績單，又有得炒盈喜。
家陣墨龍海外銷售，去到收入40%比重。集團喺海外市場認受性同知名度提高，食住阿爺一帶一路的概念，中線少少，主打油服瓣數增長，可以開turbo！
咪扯得遠，呢轉買墨龍，等深港直通，當AH股折讓，追到場內近磅中海油田（2883）52%水位，墨龍係講緊要升45%，去到8蚊嘅水平。
錢雋
細價股專家
本欄逢周一、三、五刊出