影壇有奧斯卡，香港馬壇今季則嚟咗隻同音唔同字馬匹，主角「澳斯卡」係一匹澳洲三歲自購新馬，與退役頂班多捷馬「包裝選擇」同父，馬主係全港最大馬主家族蕭百君細仔蕭劍新。
「澳斯卡」乃蕭百君家族馬匹首次由蔡約翰訓練，結果呢匹馬壇新兵初出即顯卡士，角逐今日第四場四班千二米，排14檔仍熱至2.8倍，沿途外叠居後形勢欠佳，但直路望空一衝話贏就贏，雷神如策黑衣巨人「步步友」般行過對手，大勝三身位，贏到離行離列，完全當成棚四班對手唔係馬，姿態輕鬆到你唔信，大熱W就咁開出，睇嚟質素至少坐二望一班。
蕭劍新早排已經喺谷草贏過「醉中意」，今日「澳斯卡」開埋齋，可謂好事成雙。今場大熱行頭卻大冷跟尾，95倍「爪黃飛電」最後一步追過次熱「奮鬥雄心」，117倍巨冷Q落飛黨居然可買中着晒啡燈，贏過千萬大豐收，第四名係輕磅大冧巴馬「勝捷勝」，四重彩派六萬六千幾好和味。