吳若希（Jinny）的外婆謝何秀英早前因病離逝，昨日在大角嘴九龍殯儀館出殯，Jinny因要到澳門工作未有現身，而於3月底炒單車的吳母謝芬芳堅持出院，昨坐輪椅到靈堂送別媽媽，以盡孝心。
「有啲唔捨得」
Jinny前日下午為外婆設靈後，晚上趕往沙田出席活動，問媽媽心情是否已平復？她說：「都會有啲唔捨得，會喊，但事實係改變唔到。」與同場的薛家燕合照時眼濕濕，她解釋：「 媽咪出事，家燕姐畀好多鼓勵我，始終剛喺婆婆嗰邊（指靈堂）過嚟，有啲感觸。」
吳母紙巾拭淚
昨午1時許，一身黑衣的吳母在男友、Kellyjackie和看護陪同下抵達殯儀館。吳母一頭斑白短髮，神情肅穆，精神尚算不俗。靈堂內以白花佈置，吳母以孝女謝芬芳、外孫男梓楓及外孫女嘉妮（吳若希原名）之名送上花圈。吳母由親友陪同進入內堂瞻仰遺容，表現傷心，不時用紙巾拭淚，男友全程在旁安撫，反而兒子梓楓則低調地坐在後排位置。
下午3時許，遺體送往葵涌火葬場，吳母都有隨行送別亡母，離開上七人車時明顯較吃力，需男友用力扶住上車。Kellyjackie透露吳母之後要返醫院：「佢今日抽少少時間出嚟，佢叻㗎，每日探佢都有進步，情緒波動係人之常情，但佢好堅強。」
採訪：藍文浩、王連連
攝影：仇志德、馮嘉銘