「問心呀，你覺得北京會變咩？」李慧琼畫公仔畫到差不多出腸，我們仍不放棄，問脾肺腎，問耳鼻喉，一直問下去，問出北京會變的端倪。最好問埋地質學家，到底北京幾時會地震，或者沙塵暴幾時世紀爆發。當然，問北京政變，就要問米至靈。
「收皮，講俚語都要道歉？呢個咩世界！」收皮，北京唔識，講收皮N次，以普教中的標準CCTV口音講，都唔會令北京改變。王國興可以繼續大叫收屁（放住先遲些收）、收P（愛國P牌）、收Pi（勸狀似少年Pi的泛民，蘇州過後只有一隻艇，只能跟一頭老虎怒海求生，問你點收科）。
「打人的警員有權保持沉默，有權不與警方合作。」自己友阻自己友辦公，鬼打鬼，一哥說OK。阻差辦公的不是市民的手機燈，冇燈照住，但有一哥射住。七俠五義，慈母心腸，香港警隊，降呢優化，直轄公安。將來市民要控警濫權，必須上訪至北京。北京會變？問心呀，變得更……咩！