歐聯四強周中開show，四支球隊提早喺上周六進行聯賽，已提早衞冕德甲嘅拜仁慕尼黑同埋賽前穩奪意甲嘅祖雲達斯，當然唔會同你搏盡，留番力喺歐聯先認真，但暫時未知聯賽冠軍鹿死誰手嘅西甲雙雄，就懶理咩後顧之憂，繼續強陣晒冷，結果巴塞隆拿喺「MSN」組合帶領下大開殺戒，作客8:0血洗榜尾嘅科爾多瓦；皇家馬德里雖贏得辛苦，但有基斯坦奴朗拿度（C朗）大演帽子戲法，作客以3:2力挫西維爾，齊齊袋三分後，繼續喺西甲維持兩分差距。
巴塞送8蛋予科軍
先講香港時間上周六晚十點開波嘅巴塞，呢場波賽前都知擺明冇得打，榜首對榜尾，但教練安歷基拒絕揸流攤，話之周三要喺歐聯同拜仁激鬥，一樣以MSN組合擺大個頭狂攻，踢到42分鐘先由拿傑迪錫開紀錄，但之後就越踢越順，到完場湊夠八隻光蛋贈畀科爾多瓦，MSN包辦咗六球，蘇亞雷斯首次為巴塞連中三元，美斯亦入兩粒，friend底嘅佢哋，賽後當然繼續pose更衣室合照晒「恩愛」喇，安歷基亦大讚球隊踢得水銀瀉地。
C朗戴帽反壓美斯
由於美斯起孖後，喺西甲射手榜已累積40球，暫時壓過射入39球嘅死對頭C朗，後者又點會罷休。C朗喺上周中西甲快車冇波入，仲懷疑因為唔滿意隊友艾比路亞截佢糊，喺場內又黑面又發誨氣咁，搞到賽後都幾大件事，甚至有皇馬迷向佢喝倒彩。唔知係咪受到呢啲刺激，佢呢場特別爭氣，分別喺36、37同68分鐘建功，上演帽子戲法，而皇馬最後就靠晒佢嘅入球，以3:2擊敗主場好硬淨嘅西維爾，打破咗對方維持咗近15個月、成35場不敗嘅主場金身，並且只係相隔四個小時，C朗又壓番美斯，以42球上番射手榜榜首。雙方都贏波，差距無變，所以皇馬教練安察洛堤都話佢哋唔會投降，會繼續向巴塞施壓。當然，齊齊贏波，亦肯定提高備戰周中歐聯嘅士氣，而我求大俠見美斯同C朗都咁「弗」，喺西甲鬥完入波，相信歐聯又再鍊過。
識睇，一定係睇足英台【英波Live】：
http://soccer.appledaily.com
http://bit.ly/engballlive