一年一度燕歸來。股神畢菲特上周六再現身巴郡股東周年大會，跟投資者打成一片，適逢今年係巴郡五十周年大喜日子，所以今年特別多花臣，連紀念品亦特別搞鬼，最搞笑當然係條印有畢菲特同老拍檔芒格卡通嘜頭嘅50周年紀念底橫啦，咁貼身嘅嘢有兩位財神射住，做咩都零舍朝氣勃勃，但唔知啲股東捨唔捨得着。
講明係50周年，邊個接股神班自然又係股東關心嘅事，股神冇直接答，淨係話心水人選要具備唔同嘅技能，單係揀股叻係唔足夠嘅，最好仲要擁有營運企業嘅經驗。佢又以自身為例，話多年來佢從營運企業中學咗好多嘢，話如果成世淨係玩股票嘅話，根本冇嘢可學到。