今屆冠軍一哩賽，境內外都驚咗黑衣巨人「步步友」，廿多匹海外馬報名冇一隻敢來港，連上仗主席錦標同佢串Q之本港馬「美麗之星」都退出埋，對手以出爐香港打吡冠軍「戰利品」來頭最勁，馬迷對呢場世紀之戰翹首以待，想睇吓究竟「步步友」係咪真係天下無敵。
點知編於第八場的冠軍一哩賽，跑落毫不刺激，事關1.2倍全熱門「步步友」又以晨操姿態行過所有對手，雷神一鞭冇打過，亦冇推騎，按韁自動波都贏個幾馬位，輕鬆程度同第四場「澳斯卡」有得揮，不過贏馬時間1分35秒39，以一匹頂級馬嚟講算極慢。
無論如何，「步步友」已經連續贏到第六場，在港累積16戰11勝4位1殿，總獎金突破5,200萬，全球最高評分馬，爭今季香港馬王寶座應走唔甩。今場二至四名，順序由之前主席錦標三至五名馬各升一級攞到，分別為「駿馬名駒」、「花月春風」及「驌龍」，四重彩派1,004元算好好分。
當中「花月春風」省完呢場，快將起程往新加坡，力求衛冕新航國際盃。今場最失望當然係「戰利品」，入直路冇耐未騎已轉弱墮退，大包尾輸十個半身位過終點，似乎本身有不妥，不過呢個包尾第六名，都有28萬獎金。