今日賽事跑來跑去得三兩個騎師識贏馬，跑完第八場冠軍一哩賽，雷神已四喜臨門。而去到第九場二班一千米直路賽，郭能殺番雷神一次，佢騎葉廐「跑寶貝跑」貼住外欄一放到底，氣走雷神座騎「朋友仔」，報番第八場「駿馬名駒」輸畀雷神之「步步友」一箭之仇，而郭能今日先後勝出「刺刀」、「綫路財星」、「跑寶貝跑」中三元，打造個人2015年代表作。
「跑寶貝跑」2013年10月1日建功後，跨季18場落第，今次打破接近一年半頭馬荒，累積八捷清一色贏一千米直路賽，兩位合夥馬主富商林建岳同馬會董事葉澍堃，重溫久違之贏馬滋味。
今場雷神之「朋友仔」途中一度受阻，結果追唔切做二奶，搞到廐主容天鵬都要繼續守齋，就快兩個月冇贏過馬。郭能搭雷神當旺騎師Ｑ派1,234元，認真神奇，三重彩搭摩廐名氣馬「新力風」派一萬一千幾，四重彩因有冷門「你知我心」跑第四，故派九萬三千幾。
「新力風」騎師韋達全日輸到第四隻大熱，包括「軍號」、「火乘風」、「多多勁驥」同「新力風」。