股神畢菲特嘅價值投資法備受推崇，仲吸納越來越多中國投資者做巴郡嘅小股東。有強國人趁五一假期，直踩美國奧哈馬巴郡總部朝聖。掌舵巴郡半世紀嘅畢菲特，周末舉行嘅股東大會吸引四萬幾人出席，投資者來自世界各地，今年仲有近二千幾名內地投資者參加，對比十年前小貓三幾隻，人數翻了數十番。做得巴郡小股東都非富則貴，用上星期五收市價計，一股巴郡A股值21.58萬美元，成168萬港紙；巴股B股就143.36美元，都成千一元港紙。
有一位內地投資者喺答問環節問股神，價值投資法係咪廣泛適用各地股市。畢菲特就話價值投資冇分國界，全球通用，股票代表公司股權，而非市場價格。畢菲特又提到內地市場未似美國發展成熟，所以容易被投機左右，但同時為價值投資者創造機會。股神再醒多招，話低價吸納股票唔係鬥IQ，而係控制投資情緒。股神拍檔、巴郡副主席芒格亦和應，認為內地市場需要投資非投機，要進一步強調投資價值。
畢菲特同芒格嘅回應絕非交行貨，仲點醒以億計嘅內地股民。內地股民鍾情短炒，投機味濃。今輪中央推動嘅大升市，內地股民投資思維都唔會因為畢菲特嘅一席話而改變，佢哋仲要克服最大心魔包括貪念同羊群心理。如果大媽們守得住投資紀律，無論個市係升定跌，仲點止係賺粒糖。
C+B
本欄逢周一刊出