重睇《大時代》，諗番起當年首播，小弟仲讀緊中四，15歲仲係一嚿飯。人老，真係要認，新一代14、5歲隨時已經入咗「學民思潮」，又或者未考DSE（當年叫會考）已經出咗佔領區做嘢，講嘢已經成熟如大人，思路邏輯仲清晰過離地中產。最近有一位體育明星，芳名吳安儀，世界女子桌球冠軍，傳媒一再強調佢只得24歲，而佢幾時開始學桌球？13歲。吳小姐用10年多少少就已經攻頂，服。
有日無意中睇電視，吳安儀接受訪問，講嘢淡定，聲音老成，最勁係字正腔圓。自己寫開詞，一向都捉人懶音；唔知大家有冇留意，運動員好多時懶音都幾勁，如第一金「珊潺」、「牛下車神」等，一講感受就有少少怕醜咁。但吳安儀係神態自若嘅，所以特別引起我注意。
除此，吳小姐與其父吳任水先生亦經常以父女檔出現，感情之好令人羨慕。水哥係世界大師賽前八名球手，其公子亦都打入香港公開組八強，一門三傑也。諗番80年代，戴維斯嚟香港，轟動全港，仲帶起桌球熱潮，我同朋友都成功叫阿媽買套桌球玩具，喺自己屋企開波。去到中學，大家放學都係去波樓，之後返屋企一定成身煙味。係，以前「篤波」個個都話雜，屋企實話易學壞，又多黑社會，但𠵱家已經好好多。傅家俊後有吳安儀，香港父母應該放心放仔女打桌球喇。
梁栢堅
填詞人+彩池人