前一輪，有不少傳媒訪問亞洲電視執行董事葉家寶，葉先生講起亞視，自不然有無限辛酸，佢對亞視忠心耿耿，做打工仔啫，啲大股東老闆對盤生意既然撒手不理，只求爭取番自己嘅投資，不理會現存員工死活，葉家寶何必孭上身，周圍奔走撲水，為員工籌集糧草吖，員工上法庭追討欠薪，作為執行董事，葉家寶係有法律責任嘅，故此佢講到好坦白，好驚因此而要坐監。
但大眾睇得出，葉家寶並非故意欠薪，而係已盡全力嘅嘞，撲唔到水，實非戰之罪，相信裁判官會感受到佢嘅誠意，唔會判佢坐監，或者為社會服務若干小時啦。（左丁山識得有人就是如此，所謂社會服務令，就係佢要到某公共機構洗廁所掃地，共240小時，佢平時着慣西裝打呔到中環返工，逢周末就要報到，換上清潔工人裝束去掃地，令佢諗起父親在文革時期下鄉之情況。）
點解講有誠意呢？有案例㗎，大梁粉張震遠曾經在政商界紅極一時，被林鄭月娥稱譽為公職人員之典範，威風到極，佢日常穿着嘅西裝，一睇就知道並非凡品，起碼要萬幾兩萬銀先至買到一套，點知道天有不測風雲，人有霎時禍福。張先生昔為禮賓府座上客，今為法庭階下囚，因拖欠員工薪金被判罪名成立，要入獄四個星期，裁判官話張先生對欠薪一事，缺乏真誠悔意喎。可知道欠薪還欠薪，公司董事有冇誠意去為員工籌集糧草，裁判官會視之為一個判刑多少嘅考慮因素。高交所主席自己住屋月租16萬，欠員工薪水三十零萬，相形之下，呢個世界每多荒謬事件。
寫到呢度，好少入馬場嘅財務W話今日應邀入場捧戰利品，問有冇機會。左丁山一睇排位，就老實同財務W講，點會夠跑呀，平磅賽，戰利品蝕晒磅，照計只能最多跑第二，與步步友串Q，但賠率乏味，不如淨係睇馬好過，慳番啲注碼！馬會當然希望香港有一隻世界級馬王，以示香港賽馬水準夠高，但步步友呢匹神級一哩馬，嚇怕晒所有對手，今日第八場國際一級賽，冠軍一哩錦標，冇外國馬來港參加，本地馬亦打退堂鼓，只有五匹願意陪步步友出賽，六隻馬之中，摩亞馬房佔咗四匹，蔡約翰馬房佔兩匹，根本就係投注票房毒藥，令馬會頭痛，步步友怕且都係要躍出鯉魚門，到英澳揚威咯。