中國現時面對嘅難題，其實就係典型嘅三元悖論（The Impossible Trinity）困局。所謂三元悖論，用一句話概括，即一個國家無可能對固定匯率、自主貨幣政策、資本自由流動三者揸晒fit。
用香港做例你就明白，香港係行固定匯率，資本自由流動，所以香港可以話係冇乜貨幣政策權力，貨幣供應同利率自己都冇得話事。近期有不同報道指中國可能QE，因為中國經濟下滑，而且有錢離開中國，造成通縮壓力越來越大。
中國現時係行結匯制，簡單地講，就係基礎貨幣嘅投放取決於有幾多外匯進入中國。因此當有錢離開中國時，中國基礎貨幣投放量就會縮，形成通縮壓力，具體可睇番本欄上星期之文，此處不贅。人民幣要國際化，代表將來資本要自由流動，此其一；國際化前假如人民幣大貶，邊個要？現時匯率要穩定，此其二；至於自主貨幣政策都唔使講，任何大國都想自主貨幣政策，此其三。想三樣都揸晒fit，無論係Mundell-Fleming model定Paul Krugman講嘅eternal triangle，都係搞唔掂。
中國人好早就有水為財觀念，錢如水流動，自己會識得去搵位，而且係搵最好嘅位。美國印銀紙係抽天下之鑄幣稅，但人民幣未國際化前屬於相對封閉系統，單係匯率壓力同資本流動兩樣嘢已經相沖。而且QE係最後手段，其他嘢做晒都唔掂後先QE。現時中國存款準備金率18.5%，07年金融海嘯前徘徊10至15%，英國、瑞典等國無存款準備金率，美國10%，而且中國唔係零利率，意思即係中國仍然有水位可以調控。
而且近年中國推出好多唔同貨幣政策工具，其中PSL（Pledged Supplementary Lending，抵押補充貸款）同歐洲嘅LTRO類似，最主要分別係PSL有定向特色，即啲錢注去邊到就邊到。以現時中國嘅情況，比較大可能係繼續減存款準備金率、減息同加大PSL嚟頂住，真係去到最後一步先會QE，但到時係咩世界，到時再算。
Mr. Tregunter