近年不少年輕女士加入馬主行列，部份更曾經參與選美比賽，好似「天賦致寶」馬主余妍慧就係其一，她曾參加2004年港姐選舉，大家未必有印象，但嗰屆冠、亞軍係徐子珊及朱慧敏，家陣仍活躍喺電視圈，雖然余妍慧當時不入三甲，但佢仍係公認嘅靚女。
大家咪睇余妍慧只係三十出頭左右，佢養咗馬都已經好幾年，首匹愛駒係「天賦傳奇」，曾經喺三班贏過兩場，質素唔錯，其中一場頭馬更冷至40倍，畀到余妍慧好大surprise。不過自「天賦傳奇」退役移居上水雙魚河後，余妍慧喺馬圈亦沉寂一段時間，直至今季有匹新寵「天賦致寶」登場，暫時五戰未上名，但上仗用下風騎師湯智傑，都有接近走勢，反映隻馬正開始走向勝利邊緣。余妍慧話自己不時入馬房探望「天賦致寶」，亦報讀過馬房管理課程，又曾跟練馬師葉楚航太太廖偉顏學習騎馬，係真正嘅愛馬之人。
講番「天賦致寶」，余妍慧透露是星級馬販David Price向佢推薦，她看過愛駒在澳洲一戰即大勝嘅表現，認為形格好質素高先購入。由於適應需時，所以在港初期成績欠佳，但多跑下正不斷上力，隻馬將於周日(3日)再戰，換上騎功高幾皮嘅貝湯美操刀，余妍慧分分鐘可以重返凱旋門，同一班親友拉頭馬。