網上人人掛住玩「How Old Do I Look」嘅猜猜我幾歲遊戲，電腦似乎好好人，個個都攞住細咗十年八載嘅結果大post特post。「你睇吓我幾後生！」然後可以開心一日，直到第二日見到個friend仲後生過自己，又唔抵得。「邊有咁細呀佢，個妝咁厚梗係check唔準啦。」
講到年紀，運動員最冇癮，因為呢個世界冇一行係有年齡歧視嘅，除咗運動員。玩邊項都好，第一樣嘢要報上名來就係年齡，「嘩，咁細個仲有大把前途呀。」「嘩，已經29歲咁老，難怪雲格唔要佢啦。」
而當人人都鍾意俾人認錯童顏，就只有運動人冇你咁好氣，因為個個運動人其實心目中都一定有自己一個專屬嘅數目字──可能係馬拉松嘅PB，可能係每日行咗幾多步，甚至係呢個月去咗幾多次fitness，又或只係食少咗幾多支煙。呢啲個人「冧巴」先係真正決定你係forever young，定係未老先衰。
不過，運動人又唔好得戚，以為自己與別不同係好事喎，分分鐘仲衰啲㖭。一般人嚟講呢，聽到人讚幾句唔知真心定假意嘅好說話，都會好自然咁鬆毛鬆翼嘅。「咦今日塊面firm咗喎！」「嘩因乜個人瘦晒嘅？」「冇見一排精神咗咁多嘅？」呢啲講咗唔使負責任嘅廢話，就成為咗好多人一日裏面最重要嘅精神食糧，分分鐘聽咗嘢都唔使食，個人都精神奕奕！
偏偏運動人就唔係咁嘅，人哋講乜都偏向妄自菲薄……「你今日跑得好有力喎。」「邊係吖，啲舊患都仲係好痛囉。」
「你頭先球過頭波畀得幾有心思喎。」「邊係吖，解圍咁啱撞棍箒。」
「嘩，犀利呀你又PB咗呀。」「邊係吖，今日天氣好箒。」總之，運動人心態就係永遠好似上一代教仔咁，通常自己個衰仔都係錯嘅，啱嘅話都係好彩偷雞箒；直到返屋企四野無人，終於忍唔住同自己講：「你係得嘅！」
由於把尺與人不同，運動人通常豬朋唔多，少咗機會講是非，但多咗時間練習；喺惡性（定唔知係良性）循環之下，個人越嚟越唔合群，但就越嚟越多同路朋友，而呢班朋友通常都有啲天真，因為佢哋相信人會進步，今日嘅我未必可以跑得快過昨天嘅我，但絕對可以跑得遠過以前；今日絕對可以打破噚日嘅紀錄；今日絕對可以後生過噚日……原因並唔係因為一個電腦遊戲，亦唔係人哋一句讚美，而係因為自己心裏面嘅運動細胞。
KEYMAN
節目主持