人生有幾多個十年，馬德鐘（馬神）當年放棄做警隊G4跳到螢幕，由男模變小生，他花了逾20年寶貴時光上位，偏偏沒趁勢北上吸金，眼見近年小生花旦轉投內地賺人仔。輸在起跑線的馬神雖錯過頴銀黃金10年，但不言悔，他自信憑熟男魅力定可殺出黃金路。
撰文：比華利
馬德鐘過去二十多年經營的演藝事業，全以香港為基礎，眼見不少藝人近年北上賺人仔，劇集片酬遠勝港劇，馬神都心動，今年初簽約內地經理人三年，誓要北上收復失「金」。
南北文化差異，馬神習慣香港工作模式，這次突然變換，他直認需要時間適應：「兩地文化同處事方式好唔同，有內地經理人幫手，會更加迎合內地巿場。」北望神州，但馬神都仍堅持兼顧香港巿場，針沒兩頭利，香港的工作只得靠自己，畢竟力不到不為財。
馬神環顧同輩小生，不少早轉戰內地喪吸人仔，馬神明顯遲起步十年，錯過黃金十年頴銀機會，損失保守估計近八位數字，他大呻笨：「真係最好搵嗰十年。」遲到好過冇到，馬神有信心翻身：「內地巿場好大，內地演員𠵱家好犀利，佢哋走向國際機會好大，𠵱家遲咗，我咪加快步伐。」
扮機師似細路
充滿信心的馬神，到底手握甚麼競爭本錢？他說：「我相信唔同年齡層有唔同魅力，早排我睇番《衝上雲霄》，發覺幕前嗰個自己成個細路仔咁，都未似個男人，唔夠成熟。我覺得男人係應該有男人味。」士別三日，刮目相看，馬神自問現已搣甩當年那股稚氣，身為人夫人父的他已變熟男。
唔敢請女助手
出道至今，馬神主打演出電視劇，可擔心「視味」太濃難洗底闖影圈？他反對：「唔應該將電視人同電影人劃分，內地呢樣好開放，電影同電視都係表演行業，點解拍電影唔拍得電視？點解要分得咁清楚，始終得益係觀眾，唔同組合層次，出嚟會有唔同火花。」馬神集中火力進攻內地，一年有半數時間不在港，過往緋聞多多的他怕老婆張筱蘭詐型嗎？他說：「同老婆都溝通好，𠵱家囝囝大個咗，唔使咁多時間睇住，我喺邊開工，老婆可以飛嚟，我哋又可以去附近地方旅行。」馬神不怕老婆黐身贒實，只想抽多點時間過二人世界，他強調為避緋聞，也不敢請女助手。
場地：Finest Office Furniture Supplies
