【置地廣場】現年34歲嘅樂基兒（Gaile）自從2012年同黎明離婚後，就去咗峇里跟新西蘭籍男友Denim Mchardy同居，可惜感情維持唔夠兩年就分手。去年11月Gaile決心離開傷心地重返香港模特兒界，仲積極減肥修身，密密接job。
贒實價錢牌
變番做索女嘅Gaile不愁冇人追，早前被影到同金融才俊新歡出海遊船河，閒時當然要落足本打扮一下。日前Gaile被發現去中環置地廣場shopping，當日下午12點左右，Gaile着住一套簡單運動服襯螢光粉紅波鞋，與模特兒公司同事先走入一間意大利時裝名店Maryling揀衫；Gaile似乎鍾情黑白色裙，見到一條Deep V開胸白裙更特別感興趣，低頭左摷右摷，似乎係睇價錢牌，之後就叫售貨員攞size畀佢試。Gaile都幾多心，售貨員要拎多幾條裙入試身室，可惜試極試唔啱心水，最終空手離開。
埋單傾一輪
之後Gaile轉到另一間專賣鞋及皮具嘅店舖，見佢一邊講電話一邊睇鞋，試足半個鐘終於揀到兩對啱心水鞋款。話晒𠵱家都唔再係天王嫂，見Gaile都好精打細算，埋單時睇得好清楚張單，仲同售貨員指手劃腳傾咗一輪，唔知係咪攞discount，之後先拎張信用卡出嚟埋單。離開時亦由同事幫手拎購物袋，唔使自己動手咁辛苦。
採訪、攝影：徐錦池