特首梁振英嚟緊嘅周一（4號）又飛喇，今次去波士頓，一去就去到7號先返。特別之處在於佢係應國泰邀請，乘搭香港直飛波士頓嘅航班，慶祝國泰香港同波士頓嘅直航班機投入服務。
議員：慳咗公帑
大家千祈唔好咁快就斷定佢接受款待先，事關今次佢帶埋成班官員、創科及科技界代表同佢一齊去，到埗後會了解當地科技界發展。
其實以前都有高官去過直航禮，遠至1998年做緊財爺嘅曾蔭權亦試過，所以唔係新嘢。不過順道帶埋官員去又點睇呢？資訊科技界議員莫乃光相當公道咁話，某個角度睇，有航空公司贊助政府訪問的話，都算係慳咗公帑喎，因此佢都冇乜意見。
至於國泰同政府都冇請莫乃光，佢好豁達咁話，相信經過議員被質疑接受款待後，都冇航空公司敢請議員喇；而政府嗰筆呢，根本佢自己經常都會去美國同業界接觸，唔一定要跟梁振英去，佢仲反過嚟希望政府呢次可以做到嘢㖭。