特首梁振英噚日靜雞雞去咗鵝頸橋街市宣傳政改，梁粉網媒《港人講地》好快手就將由「讀者」提供嘅梁振英落區相（圖）、片放上網，特首亦出咗篇網誌叫「生活在市民當中」，問題係網誌同埋《港人講地》啲相一樣。真係不禁要問句「點解會咁嘅？」
八方比較過特首網誌、政府新聞網同埋《港人講地》登出嚟嘅嘢，發現最齊料都係《港人講地》，事關出相嘅數量同特首網誌睇齊，而且仲有片。不過睇片發現有小朋友都唔係好願收梁振英嘢，真係陰公！
最大問題係，點解官方發佈嘅相，會同「讀者」提供《港人講地》嘅相一樣？有人向八方報料，話當時新聞統專員（IC）馮煒光都在場，唔通又係佢用佢部iPhone影？咁點解佢唔淨係畀政府，要一稿兩投畀《港人講地》？