馬會日前宣佈架構重組，將賽馬事務部一分為二，變成賽馬業務及營運部，同埋賽事規管及發展部。表面上平平無奇嘅架構重組內有乾坤，有馬會中人傳言，手術其實係為咗馬會行政總裁應家柏（圖），到2017年再留任鋪路。
應家柏喺2007年做馬會行政總裁前，就係擔任賽馬事務執行總監一職。以行政總裁5年一任計，佢𠵱家正處於第二屆任期嘅中間。馬會中人話，應家柏喺任期一半期間出手，分拆佢自己出身嘅賽馬事務部，再加埋聽聞佢計劃中嘅工作排到去2020年，並唔似一位仲有兩年就走嘅人囉。咁樣好難唔令人覺得應家柏喺2017年約滿後會再尋求留任，況且上手黃至剛都做咗11年先走喇。