警務處長曾偉雄退休在即，唔少藍絲帶依依不捨。八方雖然冇同感，不過都叫做理解佢哋嘅諗法，但係唔明白親建制網媒《時聞香港》，明明要賀曾偉雄榮休，但就整張好似悼念佢嘅設計圖片，認真係大吉利是！
一哥好人好姐，用藍色做底色已經有靈堂feel，仲要夾番着白色制服嘅曾偉雄，旁邊仲寫住「青史留名，流芳千古」，好在佢哋冇喺曾偉雄個名下面寫埋年份，唔係直頭以為真係「走咗」囉。正如網民留言話，曾偉雄仲「生勾勾」，用乜鬼嘢「千古」呀！實情《時聞香港》都唔係第一次擦鞋擦出禍，好似上次就撈亂何韻詩同盧巧音。果然豬一般嘅隊友更得人驚。