「周中波，下盤多」，今周意甲、西甲加開快車，英超又有補賽，德國又踢德國盃，結果好多戰果都爆到你唔信。好似拜仁喺德國盃俾多蒙特踢出局，利物浦喺英超輸俾護級分子侯城；嚟到星期四都仲未爆完冷，兩場主流聯賽都爆，意甲拿玻里作客2:4大敗予安玻里，全場更加有三個烏龍波，拿玻里輸埋呢場，爭前三機會大減，唔通陰謀論講教練賓尼迪斯博炒想返英超係真？
連環送禮2:4不敵安玻里
拿玻里要搶分力追第三位嘅羅馬，今仗作客風流波安玻里都要讓半/一，不過盤路要讓之餘，連入波都讓，安玻里四個入球有兩個係靠對手送大禮，雖然安玻里前鋒馬卡朗尼清脆射入，幫主隊八分鐘先開紀錄，到43分鐘拿玻里門將安度查撲出對手施射，竟然省中中堅比圖斯塊面反彈入網，上半場補時階段安玻里再由沙普拿拉建功，遙遙領先3:0㖭。
正所謂有借有還，安玻里換邊後都送禮，拿列尼烏龍波幫客軍破蛋，不過拿玻里嘅艾比奧爾後備入替又孭鑊，將對手罰球傳中錯誤撞入自己網窩，輸到1:4，就算咸錫入番粒，拿玻里都要輸2:4，開下盤之餘，仲爆出100倍波膽。
難踢歐聯 肥賓搵定後路
賓尼迪斯執教生涯都算「盃王」，好似幫利物浦贏歐聯，上季又幫拿玻里贏意大利盃，今季亦打入歐霸盃四強，又有機會繼幫車仔後，再贏呢個盃；但聯賽水準唔穩定，近六場作客輸五場，已落後第三位嘅羅馬達五分，要憑意甲前三位踢下一屆歐聯相當渺茫，拿玻里管理層已經唔滿意好耐。當然賓帥都大把後路，新一季英超帥位肯定大執位，亦傳過曼城、利物浦、韋斯咸等球隊搵佢做領隊，以英超人工高又職權大，賓sir想返英超好耐啦，所以個心都唔喺拿不勒斯好耐。早前有傳拿玻里主席迪勞倫斯想搵賓sir傾新約，賓sir經理人竟然走出嚟高調否認，慌死人唔知佢想走咁。拿玻里當然有「Plan B」，佢哋就睇中阿根廷教練比爾沙，比爾沙今季亦都約滿馬賽，佢如果過檔，拿玻里陣中嘅希古恩、安度查兩位阿根廷兵應該好開心嘞。
識睇，一定係睇足英台【英波Live】：
http://soccer.appledaily.com
http://bit.ly/engballlive