前幾日睇now體育台，睇到五月二日拳王爭霸戰嘅廣告，就係五月二日美國拉斯維加斯時間晚上6時（香港時間五月三日早上9時）嘅大賽，由美國及現任welterweight（次中量級）拳王（體重上限147磅，即67公斤）Floyd Mayweather對菲律賓／亞洲拳王Manny Pacquiao（帕奎奧），以下簡稱Floyd對Manny或更簡單啲講F對M大戰。
now嘅廣告就係叫人訂看收費直播（pay-per-view），要睇呢場拳王大戰嘅電視直播，盛惠300大元，抵唔抵呀？如果兩人打足十二回合，互無KO，靠點數分勝負嘅話，25蚊睇一個回合，確係好抵，但如果打兩個回合就有人被KO，咁就冇癮啦。之不過，翻查過往紀錄，F雖然47戰47勝，全無對手，但過往八年來，只有一次技術性擊倒對手啫，至於M，上一次KO對手已經係2009年打到第12個回合之事，故此有理由相信，F對M，大有機會苦纏糾戰到第12個回合，F在1977年出生，今年已經38歲，身高五呎八吋，重147磅，M亦唔年輕，生於1978年，36歲，身高五呎六吋，重147磅，大家雖然年紀不少，但據講身體狀態奇佳，平時訓練嚴謹，為咗呢場世紀大戰，備戰空前積極，可以相信兩人為名為利，M尤其背上菲律賓全國人民期望，大家唔衰得，拳賽精彩可期。
本來世界拳王戰過往以重量級大戰先至受眾人重視，但近十幾年來，重量級拳賽冇乜獨當一面嘅大明星拳手，反為在次中量級呢個級別，東方出了一位菲律賓人M，美國亦有一位F，於是拳賽推廣商，WBO、WBA、拉斯維加斯及澳門賭場乘機大捧呢個級數嘅拳賽，無他者，世界經濟向東移，亞洲人口眾多，亞洲人體格好難挑戰重量級拳王，但在147磅以下，亞洲拳王大有機會出現，例如中國有一位鄒市明，香港有一位曹星如，亞洲人做世界拳王不一定是「夢」。未來嘅拳賽商業模式，更要倚賴東方㖭。譬如呢場拳賽在賭城MGM賭場舉行，只有一千張公眾門票出售，其餘14500張係配售予贊助商，拳手家族／朋友，及推廣商主辦單位嘅，每張靚座位門票在網上炒到70790美元，簡直嚇死人，故此收費電視作全球直播，預料可以吸引過千萬人收睇，如果M係中國人，隨時有過億人收睇㖭，吸金潛力無窮盡。F打呢場比賽，預料可獲得總報酬二億美元，M亦可得接近一億美元，世界上有乜體育項目有咁好搵呀？