前日警務處處長曾偉雄出席其告別檢閱儀式，告別超過37年嘅警務生涯。曾偉雄話，佢，見證咗警隊蛻變成專業實幹、服務為本嘅高效能團隊，仲話:「香港持續下跌的罪案率及享譽全球的良好治安」，聽到呢度，馬上令人聯想到呢句:「我想話畀大家聽，你哋冇做錯到！」
聽完曾偉雄講嘢，黃秋生昨日就話:「呢十年嚟香港爆竊案越嚟越嚴重，依家仲無日無之，嗰條黑警之父仲好意思話香港罪案乜乜乜。真係人厚面皮則無敵。」秋生點解有感而發呢？最近爆出嘅2800萬綁架勒索案，震動全城，亦揭發西貢區一帶爆竊頻頻。好耐冇出現過嘅省港旗兵突然再度「訪港」，幫大家「尋求較公正的社會財富再分配」(抄考自陶傑)，原來，住喺大埔康樂園獨立屋嘅翁靜晶，亦懷疑有賊仔上門「光顧」，幸有驚無險。
翁靜晶於fb貼文謂，前晚凌晨3點左右，屋企警鐘響起，起初以為係誤鳴，到今日見到花園裡面嘅防盜鐵絲同石屎圍牆遭破壞，懷疑賊人當時已潛入家中範圍，但因觸動警報器而事敗逃走。翁靜晶又話:「兩星期前在屋苑亦碰上一幕『拘捕』，更還把過程拍攝下來。聞得近月，附近鄰居不斷遭遇爆竊，情況令人憂慮。」
網民紛紛留言關心，有人提議向翁靜晶女兒學武自保，「像成龍一個打十個！」翁反問:「成龍一個打十個？十個甚麼？電影裡的英雄，你相信是現實嗎？打幾多個，視乎雙方勢力。成龍打十個細路，都可能得嘅！」
劉家良師傅不在，翁靜晶一屋婦孺，難免擔心，更感謂:「康樂園獨立屋，死咗都冇人知。當年曾發生滅門劫案，《危險人物》都寫過。」、「就嚟要學70年代嗰時，組織民間自衛隊了。當年色魔處處，有居民自組保安大隊，護送夜歸婦女回家。」
組自衛隊或者暫未必，不過翁靜晶就提提大家：「防盜警報，不論家中有人無人，必須長期啟動。啟動了防盜警報的空房子，比較沒有啟動防盜警報，但有人在內者安全。切記。」其實之前翁靜晶屋企已發生過女兒家中睡覺，有陌生漢闖入屋事件，令翁靜晶驚到喊，所以一定要小心呀！