工聯會立法會議員王國興喺上周《城市論壇》同學民思潮發言人黎汶洛舌戰，破口大罵黎汶洛「收皮啦」，事後被批評佢講粗口，而工聯會班大佬，噚日仲力撐王國興叫人收皮冇問題，仲話唔使道歉！工聯會理事長吳秋北仲將呢件事，拎去同嶺大學生唱粗口歌相提並論，話要佢哋道歉係「乜嘢世界」！
噚日工聯會發起五一遊行，理事長吳秋北被問到王國興嘅「收皮」論，就話「收皮」只係俚語， 叫人唔好再用呢樣嘢攻擊工聯會。佢又批評學生雙重標準，「佢哋講晒粗口都冇人要佢道歉，講一句俚語就要我哋道歉，乜嘢世界」。而身經百戰嘅黃國健就話「收皮」唔係斯文人語言，但都冇乜人當係粗口，仲話自己同王國興都係基層代表，「講番啲基層語言都冇乜大問題吖」。
不過網民就嚟一招「以子之矛、攻子之盾」，話Fxxk喺外國都係俚語，睇過西片都知，既然立法會議員講「收皮」唔使道歉，咁工聯會係咪同時撐嶺大學生，叫校長鄭國漢收回為所謂粗口歌道歉？